ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ 81ನೇ ಅಧಿವೇಶನದಲ್ಲಿ ನೇಪಾಳದ ಪ್ರಧಾನಿ ಬಾಲೇಂದ್ರ ಶಾ ಅವರು ಚೊಚ್ಚಲ ಭಾಷಣ ಮಾಡಿದರು. ಈ ವೇಳೆ ಹಿಮಾಲಯ ಪ್ರದೇಶದಲ್ಲಿ ಹೆಚ್ಚುತ್ತಿರುವ ಹವಾಮಾನ ವೈಪರೀತ್ಯ ಹಾಗೂ ನೈಸರ್ಗಿಕ ವಿಕೋಪಗಳ ಕುರಿತು ಅವರು ಗಮನ ಸೆಳೆದರು.
ಹಿಮಾಲಯದ ಹವಾಮಾನ ಅಪಾಯಗಳನ್ನು ಎದುರಿಸಲು ನೇಪಾಳ, ಭಾರತ ಮತ್ತು ಚೀನಾ ನೇತೃತ್ವದಲ್ಲಿ ‘ಹಿಮಾಲಯನ್ ಕ್ಲೈಮೇಟ್ ರೆಸಿಲಿಯನ್ಸ್ ಮೆಕ್ಯಾನಿಸಂ’ ಸ್ಥಾಪಿಸುವಂತೆ ಶಾ ಪ್ರಸ್ತಾಪಿಸಿದರು. ಉಪಗ್ರಹ ದತ್ತಾಂಶ ಮತ್ತು ತಾಂತ್ರಿಕ ಪರಿಣತಿ ಹಂಚಿಕೆ, ಅಪಾಯಕಾರಿ ಹಿಮನದಿ ಸರೋವರಗಳ ಮೇಲ್ವಿಚಾರಣೆ ಹಾಗೂ ಜಂಟಿ ಮುನ್ನೆಚ್ಚರಿಕೆ ವ್ಯವಸ್ಥೆ ಬಲಪಡಿಸುವುದು ಇದರ ಉದ್ದೇಶವಾಗಿದೆ.
ವಿಕೋಪ ಸಂಭವಿಸಿದ ಸಂದರ್ಭದಲ್ಲಿ ಗಡಿಭಾಗಗಳಲ್ಲಿ ತ್ವರಿತವಾಗಿ ನೆರವು ಒದಗಿಸಲು ಮೂರು ದೇಶಗಳ ನಡುವೆ ಸಮನ್ವಯ ಅಗತ್ಯ ಎಂದು ಅವರು ಹೇಳಿದರು. ಹಿಮಾಲಯ ಪ್ರದೇಶವು ಸುಮಾರು ಎರಡು ಬಿಲಿಯನ್ ಜನರ ನೀರು, ಕೃಷಿ ಮತ್ತು ಜೀವನೋಪಾಯಕ್ಕೆ ಸಂಬಂಧಿಸಿದೆ ಎಂದು ಶಾ ತಮ್ಮ ಭಾಷಣದಲ್ಲಿ ಉಲ್ಲೇಖಿಸಿದರು.
