ಸಾಮಾಜಿಕ ಜಾಲತಾಣಗಳಲ್ಲಿ ಇತ್ತೀಚಿನ ದಿನಗಳಲ್ಲಿ ಸಿನೆಮಾಗಳ ವಿರುದ್ಧ ಉದ್ದೇಶಪೂರ್ವಕವಾಗಿ ನಡೆಯುವ ನೆಗೆಟಿವ್ ಟ್ರೋಲ್ಗಳು ಮತ್ತು ರಿವ್ಯೂಗಳ ಹಾವಳಿ ಮಿತಿಮೀರಿದೆ. ಸದ್ಯ ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿರುವ ‘ಪೆದ್ದಿ’ ಚಿತ್ರದ ವಿರುದ್ಧವೂ ಕೆಲವು ಸೋಷಿಯಲ್ ಮೀಡಿಯಾ ಪೇಜ್ಗಳು ಹಾಗೂ ಕಿಡಿಗೇಡಿಗಳು ನೆಗೆಟಿವ್ ಪ್ರಚಾರದಲ್ಲಿ ತೊಡಗಿದ್ದಾರೆ. ಇದನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿರುವ ಚಿತ್ರತಂಡ, ಇಂತಹ ನೆಗೆಟಿವ್ ಟ್ರೋಲರ್ಗಳ ವಿರುದ್ಧ ಕಾನೂನು ಸಮರ ಸಾರಲು ಸಜ್ಜಾಗಿದೆ.
ಚಿತ್ರದ ಕಥೆ, ನಟನೆ ಅಥವಾ ತಾಂತ್ರಿಕತೆಯನ್ನು ವಿಮರ್ಶೆ ಮಾಡುವುದು ಪ್ರೇಕ್ಷಕರ ಹಕ್ಕು, ಆದರೆ ಚಿತ್ರವನ್ನೇ ಮುಗಿಸಬೇಕು ಎಂಬ ದುರುದ್ದೇಶದಿಂದ ಪೇಡ್ ಟ್ರೋಲ್ಗಳನ್ನು ಮಾಡಿಸುವುದು ಮತ್ತು ವೈಯಕ್ತಿಕ ನಿಂದನೆ ಮಾಡುವುದು ಅಪರಾಧ ಎಂದು ಚಿತ್ರತಂಡ ಆಕ್ರೋಶ ವ್ಯಕ್ತಪಡಿಸಿದೆ. ನೆಗೆಟಿವ್ ಕಾಮೆಂಟ್ಗಳು ಮತ್ತು ಸುಳ್ಳು ಸುದ್ದಿಗಳ ಮೂಲಕ ಚಿತ್ರದ ಕಲೆಕ್ಷನ್ಗೆ ಧಕ್ಕೆ ತರಲು ಯತ್ನಿಸುತ್ತಿರುವ ಕೆಲವು ನಿರ್ದಿಷ್ಟ ಪ್ರೊಫೈಲ್ಗಳು ಹಾಗೂ ಯೂಟ್ಯೂಬ್ ಚಾನೆಲ್ಗಳನ್ನು ಈಗಾಗಲೇ ಗುರುತಿಸಲಾಗಿದ್ದು, ಅವುಗಳ ವಿರುದ್ಧ ಸೈಬರ್ ಕ್ರೈಂ ಪೊಲೀಸರಿಗೆ ಅಧಿಕೃತ ದೂರು ನೀಡಲು ಸಿದ್ಧತೆ ನಡೆಸಲಾಗಿದೆ.
ಸಿನೆಮಾ ಎಂಬುದು ನೂರಾರು ತಂತ್ರಜ್ಞರು ಮತ್ತು ಕಾರ್ಮಿಕರ ವರ್ಷಗಳ ಪರಿಶ್ರಮದ ಫಲವಾಗಿರುತ್ತದೆ. ಕೇವಲ ಕೆಲವು ಲೈಕ್ಸ್ ಮತ್ತು ವೀವ್ಸ್ಗಳಿಗಾಗಿ ಇಡೀ ಚಿತ್ರವನ್ನು ಕೆಟ್ಟದಾಗಿ ಬಿಂಬಿಸುವುದು ಚಿತ್ರರಂಗಕ್ಕೆ ಮಾಡುವ ದ್ರೋಹ ಎಂದು ಸಿನೆಮಾ ಪ್ರಮುಖರು ಅಭಿಪ್ರಾಯಪಟ್ಟಿದ್ದಾರೆ. ಸದ್ಯ ‘ಪೆದ್ದಿ’ ಚಿತ್ರತಂಡ ಕೈಗೊಂಡಿರುವ ಈ ಕಠಿಣ ನಿರ್ಧಾರಕ್ಕೆ ಸ್ಯಾಂಡಲ್ವುಡ್ನ ಹಲವು ಗಣ್ಯರು ಬೆಂಬಲ ಸೂಚಿಸಿದ್ದು, ಇನ್ಮುಂದೆಯಾದರೂ ಸೋಷಿಯಲ್ ಮೀಡಿಯಾದಲ್ಲಿ ಸಿನೆಮಾಗಳ ಮೇಲಿನ ಇಂತಹ ಸೈಬರ್ ದಾಳಿಗಳಿಗೆ ಬ್ರೇಕ್ ಬೀಳಲಿದೆಯೇ ಎಂದು ಕಾದು ನೋಡಬೇಕಿದೆ.
