ಸ್ಯಾಂಡಲ್ವುಡ್ನ ‘ದೂಧ್ ಪೇಡ’ ಖ್ಯಾತಿಯ ನಟ ದಿಗಂತ್ ಇದೀಗ ಪಕ್ಕದ ತೆಲುಗು ಚಿತ್ರರಂಗದತ್ತ ಮುಖ ಮಾಡಿದ್ದು, ಅಲ್ಲಿ ಉತ್ತಮ ಅವಕಾಶಗಳಿಗಾಗಿ ಎದುರು ನೋಡುತ್ತಿದ್ದಾರೆ. ಕನ್ನಡ ಸಿನಿಮಾಗಳಲ್ಲಿ ತಮ್ಮದೇ ಆದ ಅಭಿಮಾನಿ ಬಳಗವನ್ನು ಹೊಂದಿರುವ ಅವರು, ಇತ್ತೀಚೆಗೆ ತೆಲುಗು ವೇದಿಕೆಯೊಂದರಲ್ಲಿ ಮುಕ್ತವಾಗಿ ತಮ್ಮ ಅನಿಸಿಕೆ ಹಂಚಿಕೊಂಡಿದ್ದಾರೆ. “ನನಗೆ ಟಾಲಿವುಡ್ನಲ್ಲಿ ಇನ್ನೊಂದು ಚಾನ್ಸ್ ಕೊಡಿ” ಎಂದು ಕೇಳುವ ಮೂಲಕ ತೆಲುಗು ನಿರ್ದೇಶಕರು ಹಾಗೂ ನಿರ್ಮಾಪಕರ ಗಮನ ಸೆಳೆಯುವ ಪ್ರಯತ್ನ ಮಾಡಿದ್ದಾರೆ.
ದಿಗಂತ್ ಅವರಿಗೆ ಪರಭಾಷಾ ಚಿತ್ರರಂಗವೇನು ಹೊಸದಲ್ಲ; ಈ ಹಿಂದೆಯೂ ಅವರು ಕೆಲವು ಪರಭಾಷಾ ಪ್ರಾಜೆಕ್ಟ್ಗಳಲ್ಲಿ ಕಾಣಿಸಿಕೊಂಡು ತಮ್ಮ ಅದೃಷ್ಟ ಪರೀಕ್ಷೆ ಮಾಡಿದ್ದರು. ಆದರೆ, ಅವರ ಪ್ರತಿಭೆಗೆ ತಕ್ಕಂತಹ ದೊಡ್ಡ ಬ್ರೇಕ್ ಅಥವಾ ಹೇಳಿಕೊಳ್ಳುವಂತಹ ಯಶಸ್ಸು ತೆಲುಗಿನಲ್ಲಿ ಇನ್ನೂ ಸಿಕ್ಕಿಲ್ಲ. ತಮ್ಮ ನೈಜ ಅಭಿನಯ, ಆಕರ್ಷಕ ವ್ಯಕ್ತಿತ್ವ ಹಾಗೂ ರೊಮ್ಯಾಂಟಿಕ್ ಕಾಮಿಡಿ ಪಾತ್ರಗಳ ಮೂಲಕ ಕನ್ನಡಿಗರ ಮನಗೆದ್ದಿರುವ ದಿಗಂತ್, ಒಂದು ಸೂಕ್ತ ಕಥೆ ಮತ್ತು ಬಲವಾದ ಪಾತ್ರ ಸಿಕ್ಕರೆ ತೆಲುಗು ಪ್ರೇಕ್ಷಕರನ್ನೂ ರಂಜಿಸುವ ಸಂಪೂರ್ಣ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಕನ್ನಡದಲ್ಲಿ ಸದ್ಯ ಬ್ಯಾಕ್ ಟು ಬ್ಯಾಕ್ ಸಿನಿಮಾಗಳಲ್ಲಿ ಬ್ಯುಸಿಯಾಗಿರುವ ದಿಗಂತ್ ಅವರ ಈ ಹೊಸ ಪ್ರಯತ್ನಕ್ಕೆ ಅಭಿಮಾನಿಗಳಿಂದಲೂ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಪ್ಯಾನ್-ಇಂಡಿಯಾ ಟ್ರೆಂಡ್ ಹಾಗೂ ಭಾಷೆಯ ಗಡಿ ಮೀರಿ ಸಿನಿಮಾಗಳು ಗೆಲ್ಲುತ್ತಿರುವ ಇಂದಿನ ದಿನಗಳಲ್ಲಿ, ದಿಗಂತ್ ಅವರ ಈ ಮನವಿಗೆ ಟಾಲಿವುಡ್ ಸ್ಪಂದಿಸುತ್ತಾ ಕಾದು ನೋಡಬೇಕಿದೆ. ಅವರು ಅಲ್ಲಿಯೂ ತಮ್ಮ ಯಶಸ್ಸಿನ ಪತಾಕೆ ಹಾರಿಸಲಿ ಹಾಗೂ ಅತ್ಯುತ್ತಮ ಅವಕಾಶಗಳು ಒಲಿದು ಬರಲಿ ಎಂಬುದು ಕನ್ನಡಿಗರ ಆಶಯವಾಗಿದೆ.
