ಮಕ್ಕಳಲ್ಲಿ ಜಂತು ಹುಳುಗಳ (De-worming) ಸಮಸ್ಯೆ ಕಾಣಿಸಿಕೊಳ್ಳುವುದು ಸಾಮಾನ್ಯ. ಆದರೆ, ಈ ಸಮಸ್ಯೆಗೆ ವೈದ್ಯರ ಸಲಹೆ ಇಲ್ಲದೆ ಇಷ್ಟಬಂದ ಹಾಗೆ ಔಷಧಿಯನ್ನು ನೀಡುವುದು ಮಕ್ಕಳ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಬಹುದು. ಜಂತು ಹುಳು ನಿವಾರಕ ಔಷಧಿಗಳನ್ನು ನೀಡಲು ನಿರ್ದಿಷ್ಟ ನಿಯಮ ಮತ್ತು ಸಮಯವಿದೆ. ಪೋಷಕರು ಕೇವಲ ಅನುಮಾನದ ಆಧಾರದ ಮೇಲೆ ಅಥವಾ ಹಿರಿಯರು ಹೇಳಿದರು ಎಂಬ ಕಾರಣಕ್ಕೆ ಪದೇ ಪದೇ ಇಂತಹ ಮಾತ್ರೆ ಅಥವಾ ಸಿರಪ್ಗಳನ್ನು ಮಕ್ಕಳಿಗೆ ಕುಡಿಸಿದರೆ, ಅದು ಅವರ ಲಿವರ್ ಹಾಗೂ ಜೀರ್ಣಾಂಗ ವ್ಯವಸ್ಥೆಗೆ ಹಾನಿ ಉಂಟುಮಾಡುವ ಸಾಧ್ಯತೆ ಇರುತ್ತದೆ.
ಸಾಮಾನ್ಯವಾಗಿ ಮಕ್ಕಳು ಮಣ್ಣಿನಲ್ಲಿ ಆಟವಾಡುವುದರಿಂದ, ಕಲುಷಿತ ನೀರು ಅಥವಾ ಹಸಿ ತರಕಾರಿಗಳನ್ನು ಸೇವಿಸುವುದರಿಂದ ಜಂತು ಹುಳುಗಳ ಮೊಟ್ಟೆಗಳು ಅವರ ಹೊಟ್ಟೆಯನ್ನು ಸೇರುತ್ತವೆ. ಮಗುವಿಗೆ ಪದೇ ಪದೇ ಹೊಟ್ಟೆ ನೋವು ಬರುವುದು, ರಾತ್ರಿ ವೇಳೆಯಲ್ಲಿ ಮಲದ್ವಾರದ ಬಳಿ ತುರಿಕೆ, ಸರಿಯಾಗಿ ಊಟ ಮಾಡದಿದ್ದರೂ ತೂಕ ಕಡಿಮೆಯಾಗುವುದು ಮತ್ತು ರಕ್ತಹೀನತೆಯಂತಹ ಲಕ್ಷಣಗಳು ಕಂಡುಬಂದಾಗ ಮಾತ್ರ ಜಂತು ಹುಳುಗಳ ಕಾಟ ಇರಬಹುದು ಎಂದು ಅಂದಾಜಿಸಬಹುದು. ಇಂತಹ ಸಂದರ್ಭದಲ್ಲಿ ತಕ್ಷಣವೇ ಮಕ್ಕಳ ತಜ್ಞರನ್ನು ಸಂಪರ್ಕಿಸಿ, ಮಗುವಿನ ವಯಸ್ಸು ಮತ್ತು ತೂಕಕ್ಕೆ ಅನುಗುಣವಾಗಿ ಎಷ್ಟು ಪ್ರಮಾಣದ ಔಷಧಿ ನೀಡಬೇಕು ಎಂಬುದನ್ನು ಖಚಿತಪಡಿಸಿಕೊಳ್ಳುವುದು ಅತ್ಯಂತ ಮುಖ್ಯ.
ವಿಶ್ವ ಆರೋಗ್ಯ ಸಂಸ್ಥೆ (WHO) ಮತ್ತು ಆರೋಗ್ಯ ಇಲಾಖೆಯ ಮಾರ್ಗಸೂಚಿಗಳ ಪ್ರಕಾರ, ಸಾಮಾನ್ಯವಾಗಿ ವರ್ಷಕ್ಕೆ ಎರಡು ಬಾರಿ ಅಥವಾ ಆರು ತಿಂಗಳಿಗೊಮ್ಮೆ ಮಾತ್ರ ಮಕ್ಕಳಿಗೆ ಜಂತು ಹುಳು ನಿವಾರಕ ಔಷಧಿಯನ್ನು ನೀಡಬೇಕು. ಸರ್ಕಾರ ಕೂಡ ರಾಷ್ಟ್ರೀಯ ಜಂತುಹುಳು ನಿವಾರಣಾ ದಿನದಂದು ಶಾಲೆ ಮತ್ತು ಅಂಗನವಾಡಿಗಳ ಮೂಲಕ ಉಚಿತವಾಗಿ ಮಾತ್ರೆಗಳನ್ನು ವಿತರಿಸುತ್ತದೆ. ಸುರಕ್ಷಿತ ಅವಧಿಗಿಂತ ಮುನ್ನವೇ ಅಥವಾ ಅತಿಯಾದ ಪ್ರಮಾಣದಲ್ಲಿ ಈ ಔಷಧಿಗಳನ್ನು ನೀಡಿದರೆ ಮಕ್ಕಳಿಗೆ ವಾಂತಿ, ತಲೆಸುತ್ತು, ಅತಿಸಾರ ಅಥವಾ ತೀವ್ರ ಹೊಟ್ಟೆನೋವಿನಂತಹ ಅಡ್ಡಪರಿಣಾಮಗಳು ಎದುರಾಗಬಹುದು. ಆದ್ದರಿಂದ ಪೋಷಕರು ಜಾಗರೂಕರಾಗಿರುವುದು ಅವಶ್ಯಕ.
