ಜಾಗತಿಕ ತೈಲ ಸಾಗಣೆಯ ಪ್ರಮುಖ ಜಲಮಾರ್ಗವಾಗಿರುವ ಹಾರ್ಮುಜ್ ಜಲಸಂಧಿಯಲ್ಲಿ (Strait of Hormuz) ತೀವ್ರ ಯುದ್ಧದ ವಾತಾವರಣ ನಿರ್ಮಾಣವಾಗಿದೆ. ಹಾರ್ಮುಜ್ ಸಮುದ್ರ ಮಾರ್ಗದಲ್ಲಿ ಜಲಬಾಂಬ್ (ಮರೈನ್ ಮೈನ್ಗಳನ್ನು) ಇಡುತ್ತಿದ್ದ ಇರಾನ್ ಬೆಂಬಲಿತ ಬೋಟ್ಗಳು ಹಾಗೂ ಕರಾವಳಿ ತೀರದಲ್ಲಿದ್ದ ಇರಾನ್ನ ಕ್ಷಿಪಣಿ ಉಡಾವಣಾ ತಾಣಗಳನ್ನು ಗುರಿಯಾಗಿಸಿಕೊಂಡು ಅಮೆರಿಕ (US) ಸೇನೆ ಭೀಕರ ವಾಯುದಾಳಿ ನಡೆಸಿದೆ. ಮಧ್ಯಪ್ರಾಚ್ಯದಲ್ಲಿ ಜಾಗತಿಕ ವಾಣಿಜ್ಯ ಹಡಗುಗಳ ಸಂಚಾರಕ್ಕೆ ಇರಾನ್ ಅಡ್ಡಿಪಡಿಸುತ್ತಿದೆ ಎಂಬ ತೀವ್ರ ಆಕ್ರೋಶದ ಬೆನ್ನಲ್ಲೇ ಯುಎಸ್ ಈ ಕಠಿಣ ಮಿಲಿಟರಿ ಕ್ರಮ ಕೈಗೊಂಡಿದೆ.
ಅಂತರರಾಷ್ಟ್ರೀಯ ಜಲಮಾರ್ಗದಲ್ಲಿ ಹಡಗುಗಳನ್ನು ಧ್ವಂಸಗೊಳಿಸಲು ಮತ್ತು ತೈಲ ಸಾಗಣೆಗೆ ಸಂಚಕಾರ ತರಲು ಇರಾನ್ನ ಸಶಸ್ತ್ರ ಪಡೆಗಳು ಸಮುದ್ರದಡಿಯಲ್ಲಿ ಸ್ಫೋಟಕಗಳನ್ನು ಜೋಡಿಸುತ್ತಿದ್ದ ನೌಕೆಗಳನ್ನು ಅಮೆರಿಕದ ಅತ್ಯಾಧುನಿಕ ಯುದ್ಧ ವಿಮಾನಗಳು ಪತ್ತೆಹಚ್ಚಿದ್ದವು. ತಕ್ಷಣವೇ ಕಾರ್ಯಪ್ರವೃತ್ತರಾದ ಯುಎಸ್ ವಾಯುಪಡೆಯ ಕಮಾಂಡೋಗಳು, ಕ್ಷಿಪಣಿ ದಾಳಿಯ ಮೂಲಕ ಆ ಬೋಟ್ಗಳನ್ನು ನಡುಸಮುದ್ರದಲ್ಲೇ ಹೊಡೆದು ಉರುಳಿಸಿದ್ದಾರೆ. ಇದರ ಬೆನ್ನಲ್ಲೇ ಜಲಸಂಧಿಯ ಕಾವಲಿಗಿದ್ದ ಇರಾನ್ನ ಪ್ರಮುಖ ರೇಡಾರ್ ವ್ಯವಸ್ಥೆ ಹಾಗೂ ನೆಲದ ಮೇಲಿನ ಕ್ಷಿಪಣಿ ಉಡಾವಣಾ ಕೇಂದ್ರಗಳ ಮೇಲೂ ಬಾಂಬ್ಗಳ ಸುರಿಮಳೆಗೈಯ್ಯಲಾಗಿದೆ.
ಅಮೆರಿಕದ ಈ ದಿಢೀರ್ ದಾಳಿಯಿಂದಾಗಿ ಇರಾನ್ನ ಮಿಲಿಟರಿ ನೆಲೆಗಳಿಗೆ ಭಾರಿ ಪ್ರಮಾಣದ ಹಾನಿಯಾಗಿದ್ದು, ಹಲವು ಸ್ಫೋಟಕಗಳು ನಾಶವಾಗಿವೆ ಎಂದು ವರದಿಗಳು ತಿಳಿಸಿವೆ. ಜಾಗತಿಕ ಆರ್ಥಿಕತೆಯ ನಾಡಿಮಿಡಿತದಂತಿರುವ ಹಾರ್ಮುಜ್ ಜಲಸಂಧಿಯ ಸುರಕ್ಷತೆಯನ್ನು ಕಾಪಾಡಲು ಮತ್ತು ಮುಕ್ತ ಹಡಗು ಸಂಚಾರಕ್ಕೆ ಧಕ್ಕೆ ತರುವ ಯಾವುದೇ ಶಕ್ತಿಗಳನ್ನು ಮಟ್ಟಹಾಕಲು ತಾವು ಸಿದ್ಧ ಎಂದು ಅಮೆರಿಕ ರಕ್ಷಣಾ ಇಲಾಖೆ ಎಚ್ಚರಿಸಿದೆ. ಮತ್ತೊಂದೆಡೆ, ಅಮೆರಿಕದ ಈ ದಾಳಿಗೆ ಪ್ರತೀಕಾರ ತೀರಿಸಿಕೊಳ್ಳುವುದಾಗಿ ಇರಾನ್ ಕೂಡ ಗುಡುಗಿದ್ದು, ಇಡೀ ಗಲ್ಫ್ ವಲಯದಲ್ಲಿ ಹೈ ಅಲರ್ಟ್ ಘೋಷಿಸಲಾಗಿದೆ.
